All Dogri Sonnets
जघानूं
जघानूं कसबा ऐ – त’वी दै कंढै, प्हाड़ी दै उप्पर,
बड़ा गै खूबसूरत, मोकला परतीत होंदा ऐ।
कुसा अदना, कदीमी राजबाड़े नै इदै अंदर,
किला बनाए दा ऐ, बक्त जद बतीत होंदा ऐ,
मनुक्ख भुल्ली जंदा ऐ जे होई सकदा ऐ कुषबा, –
बगार प्रजा षा लेइयै किला उ’न्नै बनाया हा।
ते हून भामें दिंदा ऐ जघानूं कसबे गी षोभा,
प जबरन लोकें दा गौह् मारियै उ’न्नै चढ़ाया हा।
मगर में सोचनां, तारीख एह्दी जानियै पिछली,
इदे दिलकष नज़ारे च कोई तब्दीली निं औंदी।
मिरे तांईं ते इन्ना काफी ऐ जे न्हेरी रातीं बी,
इदै उप्पर करोडें तारें दी जद लोऽ ऐ पौंदी –
किले समेत एह् कसबा जघानूं षैल लगदा ऐ।
कुसा गी लग्गै निं लग्गै प साह्नूं षैल लगदा ऐ।