Explore KVMT

All Dogri Sonnets

गुज़ारष

होई जन्दी एह् जिन्द, बाझ तुन्दै बे-सुआदी ऐ,
दिला दे चीथड़ें अपने मिगी दस्सो कुआंह् रक्खां।

(दमाका च दड़ी दी पीड़ बाढू ते पुआदी ऐ।)
इनें गी घाबरे दे अऊं जिसलै, तांह्-तुआंह् रक्खां,

मी बढ़कां मारियै मोआ बछूरा खाने गी पौन्दा,
प चब्बू बट्टियै इन्दी में राखी करदा गै रौह्न्नां।

तां मेरी पालमा मूजब ऐ तेरा चेता परतोन्दा,
ते तेरा चेता औन्दे गै बड़ा खुषहाल में होन्नां।

सरोखड़ चित्ता गी चेते सरोखड़ औन जिस बेल्लै,
मेआद पूरी होई जन्दी ऐ निरदेई स्यापें दी।

मना इच चलदी ऐ लाडा दी सीतल पौन जिस बेल्लै,
तां क्हूमत समझी लैना चाही दा, गेई स्यापें दी।

में एह् ते आखदा निं जे कुदै पास्सै नेईं जाओ,
खुषी नै जाओ पर चेतें गितै समेआन देई जाओ।

Copyright Kvmtrust.Com