जीवनकथा दा मसौदा
असाढ़े कन्नो-कन्नी, जमदे गै, बने-बनाए दा,
मसौदा भेजदा ऐ ईष्वर म्हेषां, बिला-नाह्गा।
ते साढ़े अज्ज ते अतीत ते भबिक्ख ते भ्यागा,
दा स्हाब पूरा होंदा एह्दे च पूरा लखाए दा।
मसौदा जिं़दगान्नी दी कथा दे कर्मा-कर्मा दा;
मसौदा हीखियें दा, सद्धरें दा, एह्दे धर्मा दा;
मसौदा भुक्खें-रज्जें, लोड़ें-थोड़ें, झूरें-चाएं दा;
मसौदा गुफ्तगूएं, चुप्पियें, पुन्नें-गुनाहें दा; –
बजिलद ते मुकम्मल हर लिहाज़ा इच होंदा ऐ।
बिराम-चि’न्न थोढ़े’क: कुदै उपसर्ग जां कामा,
(जाह्री बाद्धा-घाट्टा जो ब्याजा इच होंदा ऐ)
कुदै सरबरक, लफ्ज़ी जोड़, कुदरै हिज्जा-क टामां-
सवाए इंदे होर किष बी ते बदलोई निं सकदा:
मसौदे कोला रत्ती इद्धर-उद्धर होई निं सकदा
सुआल – जुआब
ओ मिरगा त्राहे दा तूं चैकड़ियां की भरा करनां?
मिरै पिच्छें षकारी कुत्तें दी टोल्ली ऐ लग्गी दी।
ओ भैड़े कुत्तेओ – की इसगी तंग करदे ओ इन्नां?
एह् पुच्छो मालकें कोला जिनें गी भुक्ख सलगी दी।
मीं दस्सो मालको कुत्तें गी ओह् कैह्ल्ली दुड़ा करदे?
असें केह् आखना? एह् प्रष्न पाओ साढ़ी भुक्खा गी।
ओ भुक्खे की तिरे षा त्रास-त्रास लोक डरदे न?
तुसें गी ईष्वर दस्सग-बनाया जिस मनुक्खा गी।
ओह् मेरे ईष्वर दस्सी दे तूं भुक्खा गी की रचेआ?
अऊं निरमोह् ते निष्काम आं-पुच्छो एह् बक्ता षा।
बक्ता दस्सी दे तेरे थमां दुनियां च केह् बचेआ?
मिरा ख्याल ऐ, चंगा होऐ जे पुच्छो प्रीता षा
ओ प्रीते दस्सी दे बक्ता थमां दुनियां च केह् बचदा?
अपनी मिरगनी तांईं ऐ – मिरगा दा स्नेह् बचदा।
कींगरे गै कींगर
षुरू इच गीतकार, गीत लिखियै सोचदा ऐ एह्,
जे ओह्दी सोझा नै जीवन दा सार जान्नी लैते दा।
ते ओह्दी अक्खियें दै सामनै न कींगरे जेह्ड़े –
उनेंगी सारें कोला उच्चड़ा ऐ मन्नी लैते दा।
प जेल्लै अपने लफ्ज़ें दा नषा थोढ़ा उतरदा ऐ –
ते गीतकारा दा रुझान थोढ़ा गाढ़ा होंदा ऐ।
तां इस अकागरता मूजब उसी एह् साफ लभदा ऐ,
जे अपने लफ्ज़ें नै नषेई होना माड़ा होंदा ऐ।
ओ नज़री सामनै, प्हाड़ें दै पिच्छें, होर अनमुक्के,
असीम सिलसिले प्हाड़ें दे न खड़ोते दे ज्हारां।
ते साढ़ी बुद्धियें दी बुस्सतें दे घेरे न लौह्के।
कलेवर बड्डे न जीवन दे;-बड़ियां उच्चियां धारां।
जदांह् बी नज़र मारो कींगरे गै कींगरे लब्भन ;-
असीम म्हालिया दी चोटियें दे सिलसिले लब्भन
मस’लती चुप्पी
अगर कोई चारा निं, तां आ कुड़े बखले बनी जाचै,
गले मिलियै-अस आपूं चें पुरानी स्हेलियें आंह्गर।
असें गी जो कोई दिक्खै, ओह् इ’यै, दिक्खियै सोचै-
-”जे बनतर किन्नी ऐ इंदे च यार-बेलियें आंह्गर!!“
मना च तर्क ते तराज ते झूरे भरी लैना-
इनें नकारियें चीजें च अत्त तकलीफ होंदी ऐ।
ते बाहमी भुल्ल-चुक्क माफ करियै अलबिदा कैह्ना,
स्यानप ऐ-तबीयत खुर्रम ते खुषहाल रौंह्दी ऐ।
करोड़ें सावधानियें दै बाद बी मनुक्खा षा,
कदें-काली ते माड़ी-मुट्टी गलती होई गै जंदी ऐ,
ते गलती बख्षने तै जे दिला नै दिल निसो मनदा,
तां बाहमी राबते गी त्रोड़ना गै अकलमंदी ऐ।
प नाता त्रोड़दे लै गुप्पी-चुप्पी गै खरी होंदी,-
नितां होंदी ऐ भंडी, हास्सो-हानी बी बड़ी होंदी।
प्रसंग ते सत्तब
चकन्ना पाठक डूंह्गे लफ्ज़ें दा प्रसंग जिस चाल्ली,
तुपदा ऐ, फलौह्नी बुज्झने गित्तै, फलौह्नी च।
हिड़े दा लिंग अपने सत्तबा दी ठीक उस चाल्ली,
तपाष करदा ऐ परसिज्जली दी गर्म जोनी च।
प्रसंग लफ्ज़ें दा जदूं तक्क निं समझा च आवै,
फलौह्नी कोषषा दै बावजूद बुज्झन नेईं होंदी।
जिच्चर लिंग निं जोनी दी खीरी डूंह्गै च पुज्जै,
उदे षा अपने सत्तबा दी सार समझन निं होंदी।
बिजन प्रसंगै दे फलौह्नी दा, साढ़े दमागा च-
अति सादे जुआबा दा कोई ख्याल निं औंदा।
बिजन जोनी दे सम्पर्कै दै फ्ही लिंगा दे बित्ता च,
पवित्तर प्यारा दे नचोड़ा दा बुआल निं औंदा।
फलौह्नी, समझियै प्रसंग ऐ सखल्ली होई जंदी –
हिड़े दे लिंगा गी जोनी मुजूं तसल्ली होई जंदी।
अकीदें दी कबूली
कोई बी कीतियां, अनकीतियां करी निसो सकदा,
अबो प्रसंग ते इंदे जरूरी बदली सकदे न;
ते बडलै समझेआ गेआ हा जेह्ड़ी गल्लें गी मंदा,
उनें गल्लें दे संञां होर मतलब निकली सकदे न।
ते जेह्ड़ी कथनियें ते करनियें दे मिलदे इवज़ाने;
छड़े गाली-गलोच, हस्सो-हानी तनज़ ते ताह्ने;
फ्ही उंदै इवज़ इज़्ज़त-मान बी ते थ्होई सकदा ऐ।
ते ऐसा होंदा आया ऐ ते ऐसा होई सकदा ऐ?
नखेधां जीने दियां समझा इच्च एह् जदूं औङन,
‘वियोगी’ रंजषें कोला तूं बे-मुहार होई जायां।
सबेरै भंडने आह्ले अगर संञां लै पछताङन,
तां लौह्के लोकें दे लौह्केपुनै षा बाह्र होई जायां।
ते याद रक्खेआं:- ईसें गी पैह्लें सूली थ्होंदी ऐ;
उदै त्तपरैं गै अकीदें दी कबूली होंदी ऐ।
झूरे
अगर में किष ध्याड़े, अपने पैदा होने षा पैह्लें –
जां चार पल गै पैह्लें पैदा होंदा, मन हुमकदा ऐ?
तां कुषबा रंग मेरे होंदे होर चोखे-चमकीले –
ते मन मसूरतां, नखिद्धियां दिन-रात करदा ऐ।
अगर में अपनी हर कीती गी अनकीती करी सकदा?
ते सब अनकीतियें, करने दै काबल होई जंदा में?
जां अपनी कथनियें ते करनियें गी बिस्सरी सकदा?
तां कुषबा अपने इच्छमा दा कायल होई सकदा में?
अगर अनलिखियें चिट्ठियें गी गै, लिखी लेदा में होंदा?
जां ठीक बक्ता उप्पर, ठीक में गलाई दी होंदी?
म्हेषां सोचदा रौह्न्नां जे एह् होंदा तां केह् होंदा?
कुषबा पत-झड़ै दै थाह्र ब्हार आई दी होंदी?
मेरी पिछलियें बत्तें प फ्ही चलने दी हीखी ऐ,
मगर अनहोनी एह् होंदी कदें कुसै निं दिक्खी ऐ।
जीने दा मोह्
असाढ़ी जिंदड़ी दी लोऽ, हर सूरत ते हाल्ला च,
सरूनी होंदी ऐ मौता दे काले-मस्स न्हेरे षा।
ते बाल्लन दी मुत्हाज, हिसलने षा पैह्लें, ज्वाला च-
लोई दे खीरले खिन चंगे न बरबस्स न्हेरे षा।
चंगा हा अगर होंदे, मगर चंगे निं एह् होंदे:-
नराष हीखियें दे जान-खाऊ, भूतनू झूरे।
अगर-मगर मेरी रूहा पिच्छें लग्गे दे रौंह्दे, –
एह् रैह्त बलबले दे गौह्-गमान हीन जन ङ्हूरे।
असाढ़े चित्ता दे गुद्दे दे पुल्ले मरकज़ा अंदर –
अगर-मगर आद्दी होई गेदे जींदे रौह्ने दे –
ते प्रेत-रूपी परछौरे फ्ही बौंह्दे न मना अंदर –
अपनी कीती ते अनकीती दे होने, निं होने दे।
ते भामें जीने गी अगर-मगर करदे न बे-ढंगा,
फिरी बी जीना ऐ, मौती थमां, ज्हारां गुणा चंगा।
खदीजा बीबी दी देन
खदीजा गी, म्हम्मद दे नबी होने दे दा’वे दा,
जकीन हा सबूरा, ओह्दै कन्नै प्यार हा उसगी।
ते तां गै मूर्छत हाल्ला च, उस सुर्गी बुलावे दा,
मफहूम समझी सकेआ हा ओह् दुनियावी म्हम्मद बी।
असर हा एह् खदीजा ते नबी देे मन-मलावे दा,
जे म्हम्मद दा जकीन बल्लें-बल्लें होई आ पक्का।
ते म्हत्व समझियै पूरी त’रां सुरगी बुलावे दा,
म्हम्मद ते खदीजा नै हा छोड़ी ओड़ेआ मक्का।
उदी पैगम्बरी गी फतबा मिलेआ हा छलावे दा,
अबो खदीजा नै बे-बक्त अपनी मौती दै तिक्कर।
सबूरा साथ दित्ता लाडले रसूल बाबे दा
बिजन खदीजा बीबी दै ‘वियोगी’ दुनियां दै अंदर -,
नां होनी ही रसालत, नां कुरआन-ए-पाक लाफानी ;
नां हिजरत, नां फतह मक्के दी नां गै एह् मुसलमानी।
षोह्रत ते मकबूलियत
षोह्रत कीरती, यषमान ऐ ते नेकनामी ऐ,
अबो मकबूलियत दी बक्खरी सत्ता ऐ इस कोला।
षोह्रत मानदा दी खास सद-स्थाई हामी ऐ,
अतें मकबूलियत दा बित्त ऐ इ’दे थमां हौला।
रुहानी जज़्बा ऐ षोह्रत – बजद एह्दा टकाऊ ऐ,
अबो मकबूलियत ते केवल इक बुआल ऐ बक्ती।
इदी सत्ता अति प्रचंड ऐ प आऊ-जाऊ ऐ,
षोह्रत ऐ मगर हमेषगी दी परखी दी जुगती।
षोह्रत ओह् ज़रीहा ऐ जिदै राहें गुणी साधक,
हमेषां लोकें दी रूहें च बड़ियै जींदे रौंह्दे न।
अतें मकबूलियत दी भड़क भामें होंदी ऐ ओड़क,
अबो एह्दे नियत खिन-पल अति गै थोढ़े होंदे न।
अगर मकबूलियत मगैष ऐ बरूनी जाम्में दी,
तां षोह्रत मैह्क ऐ रूहा दे अंदरूनी मसामें दी।
टाइम – पीस
मेरी जिंदगी दे टाइम-पीस दी कमान्नी दे,
निरंतर खु’ल्दे रौंह्दे न प्लेस। केह् पता इसगी ;
कनेही; किन्नी देर पैह्लें चाबी दित्ती गेई ही ?
प्लेस खु’ल्लने आहले न बाकी रेह्दे हे किन्ने?
अधूरे कम्में दी भरमाली ऐ अनैंत्त, अनमुक्की, –
पता निं कोल्लै टाइम-पीस दा अलारम बज्जी जा।
पता निं कोल्लै मीं परमातमा, लै, दुनियां षा चुक्की?
पता निं कोल्लै मेरे साहें दा स्हाब मुक्की जा?
सकैंटें दी सुई आंह्गर ऐ मेरा दिल चला करदा।
में चाह्न्नां, आस्तै चलै, बो एह् निं आस्ता चलदा
अंकूरें च लखोई दी गति मूजब टुरा करदा, –
जिदे षा आस्तै निं एह् कुसै दै बास्तै चलदा !
ते मेरे कम्म पूरे होङन जां रौह्ङन अधूरे गै?
एह् भेत जानदे न सिर्फ ना-दीदा अंकूरे गै!!
बापसी
दुआऽ कीती में अपनी कोषषें गी छोड़ियै, इक दिन,
(अनैंत्त कषमकषें ते अमुक्क कावषें मूजब।)
षुरू च लेई जाएं, जिंदगी, जे मोड़ियै इक दिन, -?
में अपने माड़े फेह्लें गी सुधारी ओड़गा या-रब।
अल्ला बोल्लेआ, मन्जूर ऐ, बो षर्त ऐ इक्कै ;-
बदलना पौग तुक्की अपने सारे पिछले फेह्लें गी ;-
बुरे हे जां ओह् चंगे हे, बिजन भेतै, बिजन झक्कै –
बदलना पौग बदबुएं गी ते मादक फलेलें गी।“
उदी एह् षर्त सुनियै, ही बधी एह् पेषोपस मेरी, –
की जे याद मीं सपुर्दगी तेरी उठी आई।
कदें में बदली सकनां, बे-मसाल लगन ओह् तेरी?
नज़र दे सामनै, एह् सोचियै, न्हेरी उठी आई।
में फौरन आखेआ, ”अरदास मेरी मोड़ी दे अल्ला –
ते मिक्की मेरे मंदे हाल्ला उप्पर छोड़ी दे अल्ला।“
भांडें दी बुआज
सूरज निकलने आह्ला हा, ब्हा बी खुनक ही थोढ़ी:
रसोई, माता ही रातीं दे जूठे भांडे मांजै दी।
भांडे ठनकने दी बाज ही, बेह्ड़ै – मिरे धोड़ी, –
कुसै लज़ीज़ ते नादीदा ज़ायके आंह्गू पुज्जै दी।
में, कोल लेटे दे पिता गी तां सुआल एह् पाया,
”भांडे ठनकने दी बाज कैह्ली प्यारी लगदी ऐ?“
उनें मीं आखेआ, ”पागल निं बन“, ते पास परताया
ते बोल्ले, ”खाह्-मखाह्, एह् नींदरां खराब करदी ऐ ।“
में सुनियै परता उंदा फैसला-कुन, बोल्लेआ किष निं,
की जे धर्म ऐ साढ़ा, पिता दा आज्ञा-पालन।
मनो-मन, में पिता जी गी, मगर एह् क्हीकता दस्सी,
”रसोई च मंजोंदे भांडें दी-बापू, सुब्क ठन-ठन –
(जिसी तुस खप्प-खाना, आखै करदे ओ बड़ा भारी,)
मिगी पैह्लें दै आंह्गू लग्गै करदी ऐ बड़ी प्यारी।
अनुरूपता
सृष्टी दा श्री गनेष करदे, अल्ला-तआला नै,
निपुन रचनाकारै नै: समागम एह्कड़ा चेचा ;
नियुक्ती एह् खसूसी ते टकोधा एह्कड़ा निरनै;
मलाटी एह्कड़ी नोखी; रुहानी एह्कड़ा पेचा;
घनिष्ट मेल एह् कणा-कणा दा रूएं-रूएं दा;
संभोगी टाकरा नज़रें दा ओठें दा, षनाखत दा;
सरोखड़ मेल बातन दा, मनें दा, रूहें-रूहें दा;
अगोचर ताल-मेल सोझा दे ठैह्राऽ ते हरकत दा –
घटी जाने गितै, दानिस्ता बक्त निष्चत कीता हा।
तिरे नै मिलने दा रद्द-ए-अमल एह् कर्म हा मेरा:
में अपने आपा गी फौरन तेरे प अर्पत कीता हा,
ते इस सपुर्दगी च एह् अछूता मर्म हा मेरा:
जे मिक्की जिंदगी च तूं जकीनन हासल होना ऐ।
ते निष्चत होए दा ऐ-इ’यां में मुकम्मल होना ऐ:
मनुक्ख
मनुक्ख जंतू ऐ अजीब, बाकी जंतुएं कोला,
इसी सरधेड़, सिद्धी बत्ता च बी मोड़ लभदे न।
पलेस दिक्खियै होंदा ऐ भामें अग्ग-बगूला,
अबो चंगे बी केवल बत्तें दे पलेस लगदे न।
मनुक्ख केह् बलाऽ ऐ एसगी मना दी हुमकें च,
पुषीदा अपनी बहु-रूपी सत्ता दा राज सेही होंदा।
सृष्टी दी बसीह् बुस्सत दे इक त्रेलू-तुपके च-
लघुतम रूपा इच्च बस्से दा ऐ अंदाज सेही होंदा।
मनुक्ख चीज़ ऐ ऐसी जे सारा चांदी ते सुन्ना,
कमाने दै परैंत्त लगदा ऐ उसगी छड़ा कचरा
प बेधी ओड़दा ऐ चानचक्क ओसदा सीन्ना
भरोचे दा गलानी कन्नै, सूखम षे’रा दा मिसरा।
लड़ाका, लड़दा ऐ दुष्मन जदूं ललकारदा उसगी;
प ‘बे-नियाज़ होना दिलबरा दा,’ – मारदा उसगी।
गलेल
बिजन गलेलै दे, घर बेहियै पढ़दा रौंह्दा में कुषबा,
बिजन गलेलै दै में पक्खरू मारन निहा जाना।?
गलेलै बिच्च पाइयै गोल-मोल चोनमां रोड़ा,
नषाना तित्तरा गी तक्कियै कदें निसो लाना।
ते जखमी होइयै काले तित्तरा नै डोलके खंदे,
कदें बी तेरे बंगले दै पास्सै, रुख निहा करना।
ते तु’म्मी तौले-तौले स्हेलियें कन्नै कुदै जंदे,
इदी भेठा फ्ही अपना खूबसूरत मुख निहा करना।
ते तेरे दिखदे-दिखदे तेरे पचोआड़ा दी ब’न्नी पर,
काले तित्तरा नै गोषका खाइयै निहा पौना।
तुगी तै ऐसियें घटनाएं दा जकीन हैन्नी पर,
प इंदे बाझ तेरा-मेरा मेल गै निहा होना।
मिगी बिष्वास ऐ पूरा जे कारण साढ़े मेलै दा –
छड़ी गलेल ऐ; एह् कम्म ऐ सारा गलेलै दा।
गीत ते प्रीत
संभोगै कन्नै करने दै बजाए होर जोराबर,
कविता रचना दी तुलना कदें कीती निं जाई सकदी।
कविता-रचना दी तषबीह् कदें एह्दे थमां बेह्तर,
ते मेरे स्हाबें होर कोई बी दित्ती निं जाई सकदी।
संभोगै दे अनेकां रूप ते रद्द-ए-अमल होंदे
कदें एह् ऊरमा दिंदा, कदें तस्कीन दिंदा ऐ।
कदें ते तन-मलावे, मन-मलावे इक्कै पल होंदे;
कदें रंडी-मलावे आंह्गू एह् हीना करीं-दा ऐ।
कदें सुच्चा, कदें हवसी, कदें सुरगी, कदें नरकी
कदें अमरत दा घुट्ट ते कदें बिषपान होंदा ऐ
कदें ब्यापक, कदें हुच्छा, कदें गैह्रा, कदें ठरकी:
कदें कामल, कदें नाकामी दा उनबान होंदा ऐ।
जदूं होंदा ऐ मेल लगना ते त्राना ते प्रीता दा,
तदूं थ्होंदा सफल संभोग; सूखम, मुखड़ा गीता दा।
सादक – ब्यानी
तुसाढ़ी षान-षौकत ही ते रोह्ब-दाब हा सारै,
ते सारे लाट्टीखान तुंदे दबके हेठ रौंह्दे हे।
तुसाढ़े खानदाना च अगर कोई छिक्क बी मारै,
तां सारे तीसमार-खान बी लमलेट होंदे हे।
न्यायाधीष ते कृपालू हा जाह्री चलन तुंदा,
बो तुंदी, दुम्ब-ल्हाऊ नौकरें कन्नै गै बनतर ही।
बजुर्ग तुंदे जाबर हे, ते बाजब राज हा उंदा –
जां साढ़ें पुरखें दी दबकोई दी हस्ती गै कमतर ही?
एह् जो बी हा, पुरानी गल्ल ऐ, एह् हून नेईं चलनीः
तुसाढ़े राज्जें, ताज्जें कन्नै साढ़े खौफ उड्डी गे।
पुराने दकियानूसी तल्लकें दी दाल नेईं गलनी,
जमान्ने जीझूरियें दे सारे उड्डी-फुड्डी गे।
भुलाओ नेईं एह् राजबाड़ेओ सदी ऐ एह् बीह्मीं,
घमंडा गी मिलग घमंड गै ते ल्हीमी गी ल्हीमी
अबधियां ते इंद्रियां
हवा की कु’न्नै दिक्खे दा ऐ? मि’म्मी निं ते तु’म्मी निं,
बो पत्तर हिलदे न जेल्लै, हवा चलै दी होंदी ऐ।
हरारत कु’न्नै दिक्खी दी ऐ? तु’म्मी निं ते मि’म्मी निं,
फलूहे पांदी ऐ जेल्लै, अगन जलै दी होंदी ऐ।
प्रीत कु’न्नै दिक्खी दी? तुसें बी निं, असें बी निं,
प अक्खां दसदियां न जेल्लै बी एह् मन च होंदी ऐ।
है कु’न्नै ऊरमा दिक्खी? असें बी निं तुसें बी निं,
प चेह्रा दसदा ऐ, जेल्लै बी एह् बातन च होंदी ऐ।
हवाऊ ते हरारत दा बजूद जानने तांईं
जरूरत होंदी ऐ जि’यां फ्ही बूह्टें ते फलूहें दी;
साकार प्रीतै गी ते ऊरमा गी दिक्खने तांईं,
जरूरत पौंदी ऐ गोचर दृष्टी दे ज़रियें दी।
सृष्टी रचने षा पैह्लें खुदा नै अबधियां घड़ियां,
फ्ही उंदा नंद लैने तांईं उ’न्नै इंद्रियां घड़ियां।
तेरी मरजी दा गुलाम
में पुतला मोमा दा तेरे गितै, तेरे लेई बनेआ,
मीं, (जेल्लै मन करै तेरा)-तूं भन्नी लै त्रोड़ी लै;
जां सेक हिरखा दा देइयै, (फ्ही जेल्लै मन करै तेरा,
ते जिद्धर जी करै, जि’यां बी जी चांह्दा ऐ,) मोड़ी लै।
बगैर हिरखा दे सेका दै में आं षीषे दै आंह्गर
बज़िद्द ते खढ़ंग मेरे आकारा दी हर फींगर।
प हिरख थ्होंदे गै बगैर कीते डाम जां हीला,
फटक्क पिरघली जन्नां बनी जन्नां में लचकीला।
एह् मेरे होने दी बिधी दा ऐसा गै सुआतम ऐ,
जे तेरी मरजी दै अनुसार बदलोंदे न गुण मेरे।
ते तेरी मरजी दा गुलाम मेरा सारा इच्छम ऐ;
हमेषां तेरे गै इषारे प नचदे न कण मेरे।
खलार फींगरां, मरज़ी ऐ तां, भन्नी लै त्रोड़ी लै,
फ्ही जेकर जी करै मीं घालियै मुड़ियै तूं जोड़ी लै।
खीरी खिना तिक्कर
में ते बापू नै, इक दिन, ट्रेन फगड़ने लेई,
प्लेटफारमै प पैर रक्खे गै जे केह् दिखचै?
मसाफर-गड्डी नै सीटी बजाई ते चली पेई !
मनो-मन, आखेआ में, दस्स बापू, हून केह् करचै।
ट्रेन छुड़कदे दिक्खी, तां बापू पेई आ खिट्टें,
ते उसगी आखेआ में, (द्रौड़दे होई उदै पिच्छें)
”तरद्दद की करां नां? गड्डी एह् थ्होनी निसो बापू।
एह् साढ़े बास्तै ते आस्तै होनी निसो बापू।
अबो बापू नै, खिट्टें पेदे, मीं आखेआ, ”पुत्तर,
होई सकदा एह् गड्डी खंुझी जा, पर जे ख्ुांझानी ऐ
तां पूरी कोषषा परैंत्त ते खीरी खिना तिक्कर,
में इसगी फगड़ने तांईं, सबूरी टिल्ल लानी ऐ।“
मिगी चेता निं, गड्डी थ्होई ही ओह् जां निही थ्होई?
प कोषष फगड़ने दी उसगी पूरी-पूरी ही होई।
मरसिया (1)
लोथ दिक्खियै ओह्दी, मिगी लग्गा में दिक्खा नांः-
कुसै सत्त-बखले, सत्त-तरफैन, अनजाने मनुक्खै गी।
निसो पनछानन होंदा जिस त’रां, में सच्च आखा नां,
फ्ही लुंगी ओढ़ने परैंत्त, झौंगरे देह् रुक्खै गी।
नचिल्ला बैठा निं घड़ी बी जेह्ड़ा जींदे-भौंदे लै,
उदे मुहांदरे च षांती, मिक्की अजब लग्गी।
जिदे जीने दा सिरनामा हा ‘काह्ली’ जगदे-सौंदे लै,
खड़ोत ओह्दी लोथै दी अनैंत्त, बे-सबब लग्गी।
में बिलकुल सुन्न-मुन्न सोचां, ”कि’यां होई सकदा ऐ?
जे जेह्दे, जज़्बे-जज़्बे च छड़े अग्गा दे षोले हे,
उदी सब हिस्सो-हरकता गी किस चीजा नै खाद्धा ऐ?“
एह् हालत दिक्खियै मेरी तां यार-बेल्ली बोल्ले हे –
”मनुक्ख चेचगी सुआरदा रौंह्दा ऐ हर बेल्लै,
प सब बरोबर होई जंदा ऐ मौत बौढ़दी जेल्लै“
डरौकल लोक
गुलाम, मैह्कमे दै धीन, लीन केह्रे काजै च:
न रौंह्दे, इकमुखी, ममूली, केह्री हस्तियें आह्ले ;
ते उंदी ल्हीम, न्हीफ, कम्बदी, नपुंसक बुआजें च,
एह्सास सुलकदे न ईन-हीन पस्तियें आह्ले।
उमर-भर दफ्तरें च रौंह्दे न बनियै निरे चूहे:
अलोप दफ्तरें दे साज़षी, छिछले रवाजें च –
ते दिन-भर फाइलें नै सिरखपाई करदे न भड़ुए,
ते संञां रक्खियै फाइलां संदूखें ते दराजें च,
ओ फौढ़ां मारदे न आपूं-चें घरें गी जंदे लै-
खढ़ंग अफ्सरें दी निंदेआ करदे न जी भरियै।
प अपने कुम्बें ते घरें दा खस्ता-हाल दिखदे गै,
रीटाइरमैंट्ट मिथदे न, मनें-बद्धा डरी-डरियै।
मघोरें बाह्र बैठी बिल्लियै षा न डरी जंदे,
प जेकर बाह्र निं औंदे फ्ही तां भुक्खे मरी जंदे।
मोह्-माया
इक दिन अद्धी रातीं लै, सिधारथ आंगू मन मेरा
मिगी आखन लगा, ”आ त्यागचै जीने दे सब रगड़े,
एह् धरती, चन्न-तारे, घर-घ्रिस्ती-किष निसो तेरा।“
अनेकां मषवरे दित्ते मिगी उ’न्नै बड़े तगड़े।
फिरी आखन लगा, ”छोड़ी दे दुनियांदारी दे झगड़े
ते आ अस बी दना अपने गितै मौलक ‘गेआ’ तुपचै,
आ नीरन त्रोड़ियै रिष्तें दे होचै मुकतिया जुगड़े,
ते इष्टा कन्ने इक्क-मिक्क अस होने जुगे होचै।
उदी मन्नी लेई ते बे-फिकर सुत्ते दे ञ्याने पर,
में खीरी मोह्-हीन अलविदा करदी नज़र मारी
प ऐन ओल्लै गै किष छेड़ जन होई बछैने पर
ते पास परतियै लागै मिरै आई मिरी लाड़ी।
ते अपनी बाह्में च फगड़ियै उस मल्ली लेआ मिक्की,
सिधारथ ते त्याग ते ‘गेआ’ भुल्ली गेआ मिक्की।
जिरढ़ा चसका
कदें मी पुम्बली प चढ़ने दा चसका चढ़ी जन्दा,
कदें थकेमां चढ़ने दा मिगी त्रोड़ी दिन्दा ऐ –
ते हिम्मत हारियै मन हत्थ-पैर छोड़ी दिन्दा ?
मिगी खड़ोतें दी चगाठें दै अन्दर मढ़ी जन्दा ;
रुन्हाका होइयै इच्छम झिक्की खट्टें दड़ी जन्दा,
मिरी कीती-कराई गी खिनें च रोढ़ी दिन्दा ऐ –
समें दा डर अजीब, रोमै-रोमै च बड़ी जन्दा,
ते मेरी मेदड़ी दी बुनतरें गी दर्होड़ी दिन्दा ऐ।
मगर एह् चसके दा गुण ऐः-मझाटै त्रोड़ें-दर्होड़ें दै-
मस्हांदा कद्द-बित्त लेकन अपना बीऽ बचान्दा ऐ,
दबोइयै हारें हेठ ते रेहियै बिच सौड़ें दै –
एह् अपनी पुम्बली चढ़ने दी जिरढ़ी लीह् बचान्दा ऐ,
”वियोगी“ तां हमेषां आखदा आया ऐ सारें गी,
”कदें नेईं हारदे जेह्ड़े कदें मन्नन निं हारें गी।“
नफरत
”एह् नफरत ला-अलाज रोग ऐ-दीरघ बमारी ऐ।“
मिगी गुस्से नै लोक आखदे न, जानदे न ओ,
अलामत इक्क-इक्क एसदी पनछानदे न ओ।
अबो इस मंतकै च इक्क बड्डी आओज़ारी ऐ:
ओ इसगी मेलदे न प्रेमियें दे रोह्-रोस्से नै ;
ते मिक्की तमषियै जुआब तां दिंदे न गुस्से नै।
प लोकें गी पता होंदे होई बी एह् पता हैन्नी,
उनें गी जानकारी एसदी पूरी त’रा हैन्नी:
जे कूईं नफरत जेल्लै आतमा च बेही जंदी ऐ
सुन्हाके इच्छमा दी त्राना गी ढिल्ला करी दिंदी।
बतरनी जेह्ड़े बी सुआतमा च बेही जंदी ऐ,
देआरी हस्तिया दे थ’म्मे गी पुल्ला करी दिंदी।
‘वियोगी’ जान-लेवा ला-अलाज रोग ऐ नफरत,
एह् नफरत, हां एह् नफरत, नफरत दै जोग ऐ नफरत।
षून्य
धुरी उप्पर हसब-मैमूल धरती फिरा करदी ही,
ते सूरज गासा दियें पौड़ियें उप्पर चढ़ा दा हा।
हसब-मैमूल, बिलकुल नारमल दुनियां चला दी ही,
‘वियोगी’ बी हसब-मैमूल इक क्हानी पढ़ा दा हा।
ते सैह्बन, चान-चक्क एह् बिजन चेतावनी घटेआ,
जे इक धमाके कन्ने धरतरी दे पुरजे गे होई:
निजीपन धरतरी दी इक्क-इक्क चीजा दा म्हिसेआ,
करोड़ें भिन्नताएं बिच निं अंतर रेहा कोई:-
स्नेह, क्हीकतां ते हीखियां, बसोस ते दा’वे,
वियेागी, गासा, सूरज, धरतरी ते उफक ते तारे,
इरादें दी कड़ाहियें बिच तपदे लालसी लावे ;
घड़ी च हे रली गे षून्य दे बिच, सारे दे सारे।
खपत दुनियां दे टैंटें सर्ब-ब्यापक षून्य च होए,
भुलाइयै चेचगियां, इक्क-मिक्क षून्य च होए।
तेरी सत्ता मीं पता हा
मना च क्रोध हा बे-ऐंत्त, माता, तां गै में तुक्की
जुलाई उन्नी सौ बास्सी च षड़जैंतर गलाया हा।
निहा जकीन लेकन बिंद अपने आपै प मिक्की,
ते मीं इस बे-जकीनी नै बुरी चाल्ली डराया हा।
में तां गै डरदे-डरदे एह् भलोका लाना लाया हा,
जे इक दिन, तूं जरूरी, अपनी सत्ता दस्सी देनी ऐ ;
ते इक जकीन बनियै, लाना एह् मना च आया हा,
कोई मन्नै निं मन्नै, तूं अलबत्ता दस्सी देनी ऐ।
अगस्त उन्नी सौ छेआसी च एह् होआ जकीनी ऐ ;
तूं बारीदारें ते धर्म-अर्थ दे चुंगल त्रोड़े न,
ते अपनी लाज़वाल सत्ता कन्ने बीह्नी-बीह्नियै,
तूं अपने पाक दरबारा चा पापी कड्ढी छोड़े न।
ही पैह्लें बारीदारें दी प हुन भगतें दी बारी ऐ;
पुराने बक्त मुक्के न, नमें बक्तें दी बारी ऐ।
बैष्णो-जातरा
क्रख़्त त्रिवढ़ियां तब्दील करियै मुस्कराह्टें च,
फरेबी रूहें च मठास ते मसकीनता भरियै,
ते टोरें च, बुआजें च, रवेइयें च ते घाटें च,
हलीमी आनदे सब जातरू न दीनता करियै।
पुजारी काबू करियै अपने बाह्रा दे बतीरें गी,
भजन गांदे न तेरे, बोलदे न तेरे जन्कारे।
पलेटी गिद्दियें च अपने ढलके दे षरीरें गी,
मरू जनानियां बी लांदियां न उच्चड़े नाह्रे।
मगर कटड़े षा लेइयै, तेरे दरबारा तगर माता,
बज़ाहर, सारे जीव-जंतु भामें षाकाहारी न ;
प एह्के बाह्रले बतीरे दै ओह्लै मगर माता ;
एह् लोक, अंदरा सारे दे सारे मासाहारी न।
ज़’बा होंदे निं कुक्कड़, भिड्डू, भाएं बक्करे इत्थें,
प बिकदे न तली दी आतमा दे डक्करे इत्थें।
बैष्णो देवी दा षड़जंतर
बड़े साल्लें दै बाद, तेरे दरबारा च में आया:
गुफा दे बाह्र, लाइन भगतें दी, दिक्खी बड़ी लम्मी।
मनै दी डूह्गें बिच्चा निकलदा जन्कारा में लाया,
ते लाइना दे अखीरा च, फिरी, खड़ोई आ अ’म्मी।
षकल बाबूनुमा, सफेद-पोषी, दिक्खियै मेरी,
करिंदा तेरे दरबारा दा इक आखन लगा मिक्की, –
”ओ भगता, लग्गनी आ दर्षन करने च बड़ी देरी ;
अगर चाली रपेऽ मन्ज़ूर न, फौरन गलाऽ मिक्की?“
उदा एह् मषवरा सुनियै, घुली मेरे मसामें च ;
अनैंत्त कौड़तन, ते में सुनी गी अनसुना कीता:
जे रिष्वतखोर न मुकीम, तेरे बी मुकामें च,
तां दर्षन करने नेईं तेरे कदें, में फैसला कीता।
मिगी ऐ षक्क, तूं षक्ती निं, षड़जंतर एं पांडें दा;
ते मिक्की झूरा ऐ अनैंत्त, अपनी पिछली हांढें दा।
तारो
में पैह्लो-पैह्ल भोग कीता हा उन्नी सौ ठुंजा च:
(अऊं हा उ’न्नियें साल्लें दा ते ही पैंतियें दी ओह्)
उ’न्नै निंगलियै, मरदानगी मेरी, सकैंटा च,
मिगी हा घाली उड़ेआ, एह् मिगी परमातमा दी सोह्।
ब्याह्ता, बच्चें आह्ली, खर्पदी, सोह्नी जनानी ही,
रंडापे नै, उदे बुआल गी हा खट्टी रक्खे दा।
हिड़ी दी हस्ती ही मेरी, मगर बिलकुल ञ्यानी ही,
सकंजे च, समाजी नीरनें, इस्सी हा कस्से दा।
ओ पैह्ला ते अखीरी मेल हा साढ़ा, मगर यारो,
में ओह्दे घालने मूजब, अजें तक्कर बगा करना,
ते हून नुंजे साल्लें दी बरेसा च, मिगी तारो –
जदूं बी मिलदी ऐ ओह्दा अदा में षुकरिया करना।
म्हिसी नेईं मेरियें यादें चा ओ ‘तारो’ अजें तगरा
ते याद ओह्दी खरपांदी ऐ मीं यारो अजें तगरा।
हेत-हीन तफसील
जिढ़ै थाह्रै जुगें कोला, चन्हाब ऐ बगा करदा:
दुराडे माज़ी च, इस थाह्र सागर दा कनारा हा,
ते हून टिब्बा ‘गौर’ पिंडा दा ऐ जित्थें बे-परदा,
उत्थैं गै अम्बां-रांऽ दी बंदरगाहु दा तुआरा हा।
त्रैवै कींगरे दुर्गा दे, तद नज़रें षा ओझल हे,
अतें कष्मीरै दिया बादिया थाह्रै सरोवर हा।
तदूं इस देसै दे बासी, बिषाल-दिल ते चज्जल हे,
ते एह्दा बच्चा-बच्चा आतम-बिष्वासा दा पात्तर हा।
मगर इक रोज़ धरती नै दना उबड़ा हा साह् कीता:
मजूदा प्हाड़, नदियां ते सरोवर उट्ठी पे उबड़े,
सतैही नैन-नक्षे, बातनी जुस्सा तबाह् कीता,
ते कन्नै धर्तरी दै लोकें दे करदार बी बदले।
तदूं षा डोगरें हा बैष्णो गी पूजना लाया,
ते धीयां जम्मियै उनें गी जींदे दब्बना लाया।
अनहोनी
एह् डि’रगा जिगरा हा जां ब्हादरी? मिगी निसो चेत्ता।
पता नेईं कोह्के जज़्बे तैह्त, चर्ज, में करी लैत्ता?
में अपनी जिंदगी दे सीतें षा, तंग आइयै, अलबत्ता,
हा पूरे सूरजै गी अपनी मुट्ठै च भरी लैत्ता।
चफेरै गुप्प-न्हेरा छाया, होआ राज पाले दा:
बनी गे बर्फ दे तोदे-फ्ही डिग्गल सारे दे सारे।
अजें तगरा हा देवी-देवतें जिसगी सम्हाले दा:
सृष्टी डगमगाई ते भिरी टुट्टन लगे तारे:-
मिरै अंदर बलन भांबड़, सृष्टी सीतै नै कंबदी,
प एह्दै पैह्लै जे पाले नै डरियै दुनियां एह् संभदी:-
घली ही सूरजै दी गर्मी मूजब बर्फ हत्थें दी –
ते टोली, औंगलें दी बित्थलें चा, झांकी रिष्में दी।
मिगी इस रिष्में दी टोली नै गै बडलै जगाया हा ;
मिरी ठंडै थमां, सृष्टी गी, इसनै गै बचाया हा !
माफीनामा
अऊं इनसाफ निं मंगा दा, सिर्फ रैह्म मंगा नां:
में मुजरम आं, में मुलज़म निं, में मूरत आं नमोषी दी।
में अपनी करनियें उप्पर बिजन दरेग पछतान्नां,
मी बख्षी दे, तूं सुन फरेआद, इस बे-ज़ौन दोषी दी।
में हा-हाकार पाई दी ऐ, की हामी निं तूं भरदा?
बजह केह् ऐ तिरी अनटुट्ट ते अट्टल खमोषी दी?
ते की निं, मेरी बक्खी, षारा, तूं जादूगिरा करदा?
मिगी दस्सां, तुगी में सोह् पान्नां, मां संतोषी दी।
न्यायाधीष एं, निर-पक्ख एं ; बिष्वास ऐ पक्का,
मिगी जकीन ऐ, एह् गल्ल निं मजमा-फरोषी दी।
अऊं इन्साफ निं मंगा दा, में आं रैह्मा दी तक्का:
न्याय लोड़दा निरदोष गी ते रैह्म दोषी गी।
अगर, तूं माफ करने दी, मिगी हामी भरी देगा ;
तिरे आपे च, अपने आप गी, आ’मी भरी देगा।
खंडर
में पूरे बीहें साल्लें दै परैंत्त, इक्क दिन चेचा,
तपाषा चेतें दिया फत्तू दै चैगान हा आया।
लड़कपन मेरे दी होंदी ते होनी हून बी चरचा?
में इस्सै लाने च नमियां प्यूंदां लान हा आया।
बड़ा ते बोढ़ी दे जोड़े दे पक्के उस थ’ढ़े उप्पर,
बखले लोक हे – सब किष बड़ा सुनसान मीं लग्गा।
चैगाना कोला लेइयै रियोड़ियें दी हट्टियें तक्कर,
कुसै पनछानेआ निं सत्त-बखला ज्हान मीं लग्गा।
सरोत बलबलें मेरें दा लग्गा, मिक्की बे-रौनक,
उचाट चित्त हा मेरा, दुआस जीऽ हा मेरा।
ते एह् किष सोचदे’लै समझा च आई गेआ चानक,
अजीरन दिल होऐ दा इन्ना जादै कीऽ हा मेरा?
”मिरे साथी मजूद हैन्नी सो, पराने बेह्ड़ें च,
मिरै आंह्गर गै ओ मसरूफ न निजी बखेड़ें च।“
जवाब में उसी दिंदा
मिरी ; परमातमा कन्ने, मलाटी होई सुखने च।
सुआल ओ अगर करदा, जवाब में उसी दिंदा ?
कैह्ली, रूह् ऐ मषगूल मेरी, तपने-धुखने च ?
(त्रट्टां मारदी पीड़ें दा स्हाब में उसी दिंदा।)
की मैह्ल सद्धरें दे न बने दे बद-षकल खंडर,
चीस चाएं दी ऐ जिंदियें चूह्कें चा गूंजा दी,
ज़िल्लत, तांह्गें दी, पिट्ठी च, पैह्लें खोभियै खंजर,
बड़े हेजलपुने कन्नै, मिरे मुरदे नै पूंझा दी?
ओ मेरे तांईं चेचा आया हा, जकीन ऐ मिक्की,
ते मेरे ब्योरे च सचाई ही, पूरी हकीकत ही,
पर इक्क बारी बी नेईं दिक्खेआ उ’न्नै मिरी बक्खी,
फ्ही षायद, सच्च सुनने च उसी बझोई दिक्कत ही?
उदा परमातमातब होई जाना हा बड़ा नींदा,
सुआल ओ अगर करदा, जवाब में उसी दिंदा।
अमल
जदूं बी असलीयत कन्नै मलाटी सुखनें दी होंदी,
ए क्हीकत ऐ जे जेह्ड़ी क्हीकत ही रौंह्दी निसो क्हीकत ;
तरारें च नमर्दी बे-बसी, बे-चारगी पौंदी ;
सुडौल हीखियें दी, डाह्डी, आई जंदी ऐ षामत।
सुखनें च पचीदा मसले बी सखल्ले होई जंदे,
प बडलै, आदमी तांईं, रुजान्ना अक्ख भु’लदे गै,
सैह्ज सुखनें दे कलेवरें गी भुलदे-भुलदे गै:-
सारे बल्ल हल्ल, सुखनें दे, कबल्ले होई जंदे।
खुदा दिंदा ऐ पैह्लें सुखने फ्ही उंदा दमन करदा,
चरूनी पैह्लें कोला सुखनें बाद कौड़तन होंदी ;
प रात पौंदे गै सुखने फिरी लैने दा मन करदा
मना गी सुखनें कन्नै इन्नी बे-पीरी लगन होंदी
नषे च चूर फ्हीमियें दा चंगा हाल होंदा ऐ,
नषा त्रुटदे गै लेकन उंदा जीना म्हाल होंदा ऐ।
वेदपाल ‘दीप’
जदूं दिक्खो उनेंगी बालें गी झंझोड़दे लभदे,
ते सूटा खिच्चियै सिगटा दा लम्मा आखदे, – ”भाई
(मी चु’न्नी अक्खियें च सैंखां झूरे द्रौड़दे लभदे।)
असें गी लोकाचारियें दी रत्ती जाच निं आई।“
कबुद्धां करने दे षौंकी न ओ पर लफ्ज़ें दै अंदर,
भरी दिन्दे न सारी षूनता मना दी सौड़ा दी ;
ते उन्दी गुफ्तगू दे गुड़कदे मकालमे अक्सर,
भबिक्खवाणी करदे न कुसा संगीन होड़ा दी।
कसैले होन जां मिट्ठे, मखीरी होन जां कौड़े,
प ‘दीप’ जिन्दगानी दे सुआदें दे गझोकड़ न।
निजम सब ज़िन्दगी च कामयाब होने दे त्रोड़े,
प गज़लें दे गवेइये उन्दै आंह्गर इक्कड़-दुक्कड़ न।
भां आपूं अपनै आप आखना लगदा ऐ बे-ढंगा,
प मिक्की आखदे न – ”तेरा बी अन्दाज़ ऐ चंगा।
गुज़ारष
होई जन्दी एह् जिन्द, बाझ तुन्दै बे-सुआदी ऐ,
दिला दे चीथड़ें अपने मिगी दस्सो कुआंह् रक्खां।
(दमाका च दड़ी दी पीड़ बाढू ते पुआदी ऐ।)
इनें गी घाबरे दे अऊं जिसलै, तांह्-तुआंह् रक्खां,
मी बढ़कां मारियै मोआ बछूरा खाने गी पौन्दा,
प चब्बू बट्टियै इन्दी में राखी करदा गै रौह्न्नां।
तां मेरी पालमा मूजब ऐ तेरा चेता परतोन्दा,
ते तेरा चेता औन्दे गै बड़ा खुषहाल में होन्नां।
सरोखड़ चित्ता गी चेते सरोखड़ औन जिस बेल्लै,
मेआद पूरी होई जन्दी ऐ निरदेई स्यापें दी।
मना इच चलदी ऐ लाडा दी सीतल पौन जिस बेल्लै,
तां क्हूमत समझी लैना चाही दा, गेई स्यापें दी।
में एह् ते आखदा निं जे कुदै पास्सै नेईं जाओ,
खुषी नै जाओ पर चेतें गितै समेआन देई जाओ।
नुक्ता-नज़र
भ्यागा तक्क हा मी आस्था दा जुंग बे-फौन्दा,
प मी षतानियां-षतूनियां न भान्दियां अजकल।
कबुद्धें भाएं कड्ढी दी ऐ मेरी तांह्गें दी खुक्खल,
प अपने-आपा गी मेरे षा दोष देन निं होन्दा:-
की जे पाप बी ते पुन्न बी तूं गै करान्ना एं।
एह् दुनियां खेड ऐ तेरी ते चाल डाह्डी ऐ ;
असें गी आस्थी-अनास्थी तूं गै बनान्ना एं ;
एह् तेरी चाल आगू ऐ ते तेरी चाल फाडी ऐ।
नमेद तूं, चनामत तूं सुक्खन तूं, सरीनी तूं,
ते भजन गाने आह्ला बी गुआने आला बी तूं एं।
तूं गै षक्क ते षरधा, जकीन, बे-जकीनी तूं ;
जकीन देने आह्ला बी, मुहाने आह्ला बी तूं एं।
ते इस नुकता-नज़र मूजब-जो हाल होआ मेरा ऐ ;
एह्दे च हत्थ मेरा कोई निं, कसूर तेरा ऐ।
