All Dogri Sonnets
कलापा
मना गी हौसला दिन्नां गलाइयै – ”सुन मिरे भाई –
तूं कल्ला निं, तेरै कन्ने, तेरा कल्ला कलापा ऐ।“
मिगी मन आखदा ऐ-”गल्ल मिक्की समझा ते आई ;
निहालप रोग ऐ लेकन, मसीबत ऐ, स्यापा ऐ।“
अऊं निं हारदा हिम्मत, गलान्नां – ”ठीक तूं आखी,
प’ जेह्ड़ी गल्ल-बात करनी ऐ तूं सज्जना कन्ने,
ओ दस्स तूं कलापे गी – बनाई लै ओसगी साखी।
कलापा इक्क-मिक्क तां मना होग्गी मना कन्ने !“
एह् सुनियै आखदा मन – ”फलसफा ऐ तेरा बे-मैह्नी,
कलापा भूत ऐ, छौरा ऐ ते मारू बमारी ऐ।
एह् ऐसी कोठड़ी ऐ, जेदै बिच्च ब्हाऽ गै हैन्नी,
नां रोषनदान, नां कवाड़ ते नां गै दुआरी ऐ।“
बजाए पैरवी करने दै, मन आखै – ”कलापे दी,
दुआई दे मिगी कोई ‘वियोगी’ इस स्यापे दी।“