All Dogri Sonnets
मसरूफियत
अऊं मसरूफियत मूजब रुकी सकेआ निं मौती तै।
मिगी मिलने गित्तै तां मौत आपें गै चली आई।
चिरा दे बलगदे किष आरजूमन्दें नै निबटी लैं ;
उसी में दिक्खियै तां फूढ़ी ओदी बक्खी सरकाई।
ओ चप्पी मारियै बैठी ते सारें पर नगाह् सुट्टीः-
दुआसी, रंज, हास्से, हीखी उसगी बलगदे लब्भे,
ते रींघ बलगने आह्लें दी ही लम्मी ते अन-टुट्टी:
करोड़ा रुलदियां लटकां: करोड़ां हुमकदे जज़्बे।
अऊं मसरूफ हा ते ओदै लाग्गै औन निं होआ, –
(बड़े बारी मी उन्नै सैनतां करियै बुलाया हा।)
बो मुकती देर ओह्दे षा नफिच्चे बौह्न निं होआ ;
ओ चलदी होई ते जन्दे समैं मिक्की गलाया हा ;
”अऊं जन्नीं, मिली औन्नीं, फ्ही बेह्ले लोकें गी उच्चर;
तुहाकी बैह्ल निं होन्दी ”वियोगी“ जीने षा जिच्चर।