All Dogri Sonnets
षानदार दीबाचे – छिछले मज़मून
जदूं कुंवर ‘वियोगी’ डोगरी अदबा च हा, आया,
बड़ा गै रौला-रप्पा हा, अनैंत्त खोखलापन हा।
ममूली, मो’तबर लोकें दा इत्थें बोल-बाल्ला हा,
इदी सरगर्मियें च झूठ हा ते दोगलापन हा।
चलैंत्त म्हावरे छिछले हे ते फिकरे टरें आह्ले,
दीबाचे षानदार हे मगर मज़मून अदने हे।
नकलची बुद्धी-जीवियें दे हे, दा’वे टरें आह्ले,
भरोचे, पोथियें दे, नकलची सोचें नै पन्ने हे।
बड़े चाऽ लेइयै आया हा, मगर थोढ़े दिनें च गै,
ओ एह्दा बातावरण दिक्खियै दोआस होआ हा;
छिछले डोगरी अदबा च, औंदे गै, खिनें च गै,
उसी इक साह्-घोटू घुटनै दा एह्सास होआ हा।
अजकल तां ‘वियोगी’ कल्ले बेहियै लिखदा रौंह्दा ऐ,
ते बेहियै ”मोकलै“ सारे तमाषे दिखदा रौंह्दा ऐ।