Explore KVMT

All Dogri Sonnets

पुरख कवि

परानी पोथियें च गीत उच्चे-उच्चे कवियें दे –
लखोए दे, छपोए दे – अदूं दे मिक्की थ्होए दे:

इनें गी पढ़ियै, खाके खिच्चा करनां उन्दी छवियें दे –
सदैव-रूह्, हस्ती, चित्त ते मन र्हान होए दे:-

कुसा नै जिन्दगी दे रौले-रप्पे दे अकारा षा,
मधु-मक्खी दै साहीं मिट्ठा-पन ऐ चूसी लैते दा।

कुसा नै काली-मस्स रातीं दे बे-थौह् खलारा षा,
टटैने आंह्गर बलने दा तरीका खूसी लैते दा।

कुसा नै पीड़ै दा सारा कलेवर नापी लैते दा,
कुसा नै हासें दी हद्दा गी जाइयै छूही लैते दा,

कुसै परमातमा गी छातिया च छापी लैते दा,
कुसा नै रोई-रोई कालजे गी थूही लैते दा।

‘वियोगी’ उन्दे सिर्फ कन्न निं, आतम बी बोला ऐ,
ओ जेह्ड़े आखदे संगीत नेईं ऐ घैंको-रौला ऐ।

GREETING

We are glad that you preferred to visit our website.

X
CONTACT US

Copyright Kvmtrust.Com