All Dogri Sonnets
प्यारा दा पासकूं
तराजू जिंदगी दा साफ-साफ दस्सा करदा ऐ:
दुखें दा पल्लड़ा भारा, सुखें दे पल्लड़े कोला ;
एह्सास, कमतरी दा कालजे च बस्सा करदा ऐ,
ते जिगरा इच्छमें दा होए दा ऐ पस्त ते हौला।
मना दी पस्तियें गी में ज्हारां हौसले दिन्नां,
मगर मुरझाई दी हीखी दी हैन्नी मुरदनी जंदी:
दिला गी जेल्लै बी झूठा दलासा, रौंसला दिन्नां,
मिरी क्हीकत-पसंदी रस्ते दी अड़चन बनी जंदी।
ओ मेरे हानियां, जदूं षा हैन्नी मेरै कोल तूं,
अदूं षा में सुआल्ली आं, कदूं ऐ तूं मिगी थ्होना?
जदूं बज्झग, मिरी भेठा तिरे प्यारा दा पासकूं,
बरोबर जिंदगानी दा तराजू ऐ तदूं होना।
एह् जिच्चर होग निं, दिला दी हालत इ’यै रौह्नी ऐ:-
सुखें दी भेठा षा दुखें दी भेठ भारी होनी ऐ।