All Dogri Sonnets
ठंडा ऐंट्ट
तूं मेरै कोल ही ते जीने दा सुआद हा नोखा,
ते अपनी, जीने दी म्हारत दा अत्त गरूर हा मिक्की।
रंगीली गतियें-बिधियें दा बी हर इक रंग हा चोखा,
गमान हा, जे हासल, जीने प, अबूर हा मिक्की।
मीं तां गै तूं जदूं गलाया जे गरूर नेईं चंगा,
तुगी द्रंडेआ हा में, बड़े गै खौह्रे लैह्जे च,
ते जिल्लै तूं मिगी गलाया हा मूरख ते बे-ढंगा,
कसैली कौड़तन घुली गेई ही मेरे मज्जे च।
प दूर होइयै तेरे षा पता लग्गा ऐ मीं जिंदे,
नषा सब जीने दा तेरै बगैर उ’ल्ली जंदा ऐ,
तिरे बगैर ऐंट्ट ज़िंदगी दा भखदा निं जिंदे,
ते सारा गौह्-गमान म्हारतै दा भुल्ली जंदा ऐ।
गरूर, गौह्-गमान, तेरै उप्पर गै मुन्हस्सर ऐ।
ते मेरा जीन-ज्हान, तेरै उप्पर गै मुन्हस्सर ऐ।